Monday, April 23, 2012

Cerpen Banjar.....Sayang Si Julak

Patang tu Julak taunggut dilalongkang....angin nang batiup sapoi-sapoi bahasa....mambawa jauh kanangan Julak kamasa silamnya. Sudah 60 umur Julak. magun haja hidup bujang..magun haja badiam dipondok usang dihujung bandang...magun haja bajualan ais krim. Siapa nang kada pinandu ka Julak...dari kakanakan hampai ka nang tuha....kling!!! kling!!!!...bunyi lonceng Julak bajualan ais krim awan basikal. Matan umur 17 tahun hampai wahini tu pang gawian bajualan , bajaja ais krim. Sambil maunggut tutih kadangaran diradio lagu...nyanyian L. Ramlie “ dara Pujaan “ , umai marasap menyelinap kajiwa Julak....kenangan silamnya makin jalas...tabayang dimata muha Imas gadis pujaan. Suah jua urang batakun napa Julak mambujang kada kawin-kawin. “ Kadadak jodoh “ jar Julak ringkas manjawap. Sebenarnya urang kada tahu batapa perasaan Julak maluap-luap handak berumah tangga kaya urang lain, handak baanak pinak bakaturunan tapi apakan daya jodoh kada sampai.

Masa tu umur Julak dalam 20an...hari-hari bajaja bajualan ais krim. Amun ada urang aruh bakawinan disitu pang Julak bamandak, bajualan ais krim...tuan rumah kabiasaannya manawari makan ka Julak...kada suah Julak menolak..rezeki jar...malaran hagan ari tu. Satu hari Julak bajualan ais krim ditampat urang baarohan kawin di parit 8. Laku jua jualan Julak ari tu....kada manang tangan..maklum lapas urang mangarat banih, kakanakan gin banyak basanguk duit. “ Bang ais krim potong dua “ jar Imas. Bungkam Julak kada suah malihat bibinian sabungas Imas...sambil galataran tangan Julak menjulungi 2 batang ais krim potong...” berapa bang “ jar Imas. Dua kupang jar Julak, sambil mata kada lapas merenung Imas. “ Jual lah “ jar julak. “ He..ih “ jar Imas sambil takurihing manis ka Julak. Bah... asa luruh jantung Julak. Mulai ari tu hari-hari pang Julak lalu di Parit 8 bajualan ais krim...kada suah katinggalan.

Julak gin hudah tahu rumah Imas, panandu ka Haji Saleh urang tuha Imas Imam surau parit 8. Bila hampai di hadapan rumah Imas mesti Julak bamandak...mun Imas kada manukar ais krim sengaja Julak mambarie. Mun Imas dahandak dijulunginya ka nang ading si Ulan sambil Julak bapasan kirim salam ka kakak jar. Ulan nang hanyar baumur 5 tahun tutih malompat-lompat kasukaan dapat ais krim. Kina disampaikannya salam si Julak, Imas senyum takilum-kilum kasupanan. Ka itu pang perhubungan Julak awan Imas. Sampailah satu hari Julak mengirimi surat meluahkan isi hatinya ka Imas, surat tutih dikirimnya malalui Ulan, ais krim colet pulang jadi upahan. Dua hari lapas tu surat Julak babalas...napa jar urang batapuk kada sabalah tangan, gayung bersambut kata bersahut...rupa-rupanya si Imas gin menyintai Julak.

Malam tu Julak duduk basila rapat dihadapan Pakacil Asim ayah angkatnya. Julak nia urang pandatang ba-asal dari Langkap Perak....nang ayah Banjar, umaknya Melayo, keduanya hudah lawas meninggal matan Julak baumur 8 tahun. Di haragu pulang oleh paniniannya. Bila peniniannya meninggal, tu pang Julak merantau hampai ka Sungai Besar, Selangor. Bajualan ais krim dari Parit 1 hampai Parit 16 dari sepagi jam 9 hampai patang, ka itu pang hari-hari. Bakanalan awan Pakacil Asim di kadai kopi Aheng Sungai Besar...tarus mengaku ba-ayah angkat awan hidin. “ Ako yah...handak bapara awan Imas anak Haji Saleh Imam surau parit 8 “ jar Julak membuka pandiran. ” Nah ham ganal gawian tu.....anak urang sugih, anak urang alim “ , jar Pakacil Asim. “ Andika tolong jua jalankan...ako awan Imas hudah suka sama suka, katuju handak bakawin “, jar Julak meyakinkan Pakacil Asim. “ Amun damintu kina ako mamikirkan hari napa nang baik tulak bapara karumah Imam Saleh “ , jar Pakacil Asim sambil mahiut rokok pucuk nya dalam-dalam. Malam tu Julak kada karuan guring...macam-macam nang difikirkan, satujukah Imam Saleh menerima pinangannya, amun satuju barapa hantaran...taga bila tabayang muha Imas nang bungas tutih...hayalan Julak jadi gembira...penuh bunga-bunga nang bewarna-warni..alangkah bahagianya dunia ini jar Julak, angan-angan tutih Julak bawa dalam mimpi indahnya samasa taguringan.

Pagi Jumahat tu, Pakacil Asim, nang bini Makacil Maah, Nanang awan Busu Imok tulakan karumah Imam Saleh mambawa hajat Julak handak bapara ka Imas. Sakira-kira rapat silaan, hudah manginang barokokan....” kami datang ni mambawa hajat ganal “ jar Pakacil Asim “. “ Ayuha padahakan napanya hajat tutih...mun hingkat kami tunaikan- kami tunaikan “, jar Imam Saleh. “ Anak angkat kami tu..si Julak nang bajualan ais krim – bahajat handak ka Imas “, ujar Pakacil Asim. “ OOOOO...si Julak tutih...” jar Imam Saleh sambil maurut-urut jangut sejemputnya...ada garisan bekerut-kerut di dahi Imam Saleh. “ Ka ini ha....kami kada hingkat mambagi kata putus...kaina batakun ka nang ampunya diri “, jar Imam Saleh meminta tempoh barang seminggu.

Saminggu lapas tu Imam Saleh awan nang bini Hajah Sariah batandang ka rumah Pakacil Asim di Parit 6. Balum sawat menjulungi banyu..Imam Saleh mejulungi balik cincin merisik “ minta maaf banyak-banyak...anak kami si Imas tu halui lagi , bamasak, batatapas gin kada bisa, basisimpun napa pang lagi..jahnya handak mangaji “ , ujar Imam Saleh menolak cara behimah pinangan si Julak, matan hidin urang baugama.

Umai kasian si Julak..mana supan lagi...mana asa keciwa lagi...parak saminggu Julak kada bajaja. Hampai hati Imam Saleh kada merestui pinangan si Julak, matan Julak urang miskin, yatim piatu, rupa kurang harta kadadak. Imas gin amat kacewa awan keputusan nang abah, taga apakan daya inya urang bibini kada wani malawani kuitan. Walaupun cinta dan sayangnya pada si Julak, taga kaputusan Imam Saleh muktamad, kada hingkat dirunding kira lagi. Ujar Imam Saleh ada haja jodoh nang labih baik dari Julak. Mun Imah kada ma-asi hidin kada handak mangaku anak.

Suah Imas mengirim surat ka-anu Julak mambawa-e kawin lari. Taga balum sawat Ulan membarikan surat tutih ka Julak, katahuan ka Imam Saleh....surat tu dikoyak-koyak hidin...patang tu laih pang si Imas kana panampar kana panandang Imam Saleh. Tuhuk nang umak batata...napang Imam Saleh macam dirasuk syaitan....basupanan mun urang tahu jar hidin.

Anak dara mambawa-e lalaki kawin lari...halui-halui Imas pada penglihatan hidin...mun diturutkan hati mau ditimbak hidin si Imas awan sanapang dua laras nang tasandar dihiga katil.

Marista banar Julak mandangar habar Imas dipukuli nang kuitan. Apa lagi jar Imas di pukuli oleh nang kuitan sabab handak kawin lari awan Julak. Taga Julak ni urang penyabar , mun ka urang lain saja dibawa-e lari pang si Imas...matalahan pulang Imas handak ka Julak. Ada jua nang ma-api-e Julak...” pantang anak lalaki dicabar jar...diulahi, diikhtiar haja si Imas tutih.....biar sama-sama haja.....hapus muha “ , taga Julak kada ambil hirau wadaan urang. Basa-sabar haja jar Julak dalam hati...hudah jodoh ku kadadak.

Tiga bulan lapas tu tadangar habar jar Imas dikawinkan Imam Saleh awan nang sapupu. Habaran tu macam halilintar mamanah dada Julak. Asa lamahan batis....umai barat banar dugaan hidup ku ujar Julak....sambil badayung basikal ampah bulik sambil maingui Julak manangis. kada sanggup lagi asanya handak hidup, kada sanggup walau malihat bumbung rumah Imas...ka itu pang parasaan Julak, keciwa....keciwa teramat sangat. Dihari perkahwinan Imas, sangaja Julak mamasang lagu S. Jibeng ‘ Inai Dijari ‘ bukan sakali malah bapuluh kali hampai habis beteri rekod piring hitam nang hanyar ditukar. Patang tu Julak dapat surat nang di kirim Imas melalui kawannya nang tulak aruh. “ Abang malam ni Imas handak jumpa Abang jam 12 dibawah rumah “. Bapuluh kali Julak mahafal kata-kata ringkas surat Imas. Tulak ka kadak...babalah bagi parasaan Julak.

Tacabar jua kalalakian Julak.....ah kada kira apa handak jadi- jadilah. Malam tu tepat jam 12 Julak hudah hampai dibarumahan Imam Saleh. 3 kali Julak manjantik lantai...Imas hudah faham..bagimit Imas maungkap lantai bilik...bagimit maulur batis, disambut Julak nang hudah mahadange dibarumahan. Masih lagi babaju pangantin dingur-dingur ba-bau arom. Bapaut baragap Imas kapohon guluk Julak. Di upang Julak ka rumpun pisang dihiga rumah. “ Abang bawa ha Imas lari...Imas dahandak awan urang tu...

Imas handak ka Abang “ jar Imas sambil mandingui tatangis, tangan Imas maragap pinggang Julak. “ Jangan ding-ai kina basupanan keluarga ikam”, jar Julak. “ Maraha...Imah dahandak kawin paksa “ , Julak mengusap-usap rambut Imas, jarinya mangalatar manyeka banyu mata Imas. “Amun abang kada sanggup mambawa Imas lari...abang ulaha napa haja ka Imas...Imas sarahkan diri Imas ka Abang “, jar Imas tajalipuk di batis Julak. Imbah tu napangada-i baguling-guling pang kaduanya di perdu pohon pisang. Habis keronyok baju pangantin....tabularai tabulirit. Pukul 4 pagi hanyar Imas bagimit pulang naik kabilik. Julak bulik karumah awan langkah nang longlai....asa puas hati gin ada..menyesal gin ada...kecewa dan sedih nang ianya. Imas masuk kabilik pangantin...lakas-lakas buhurup tapihkain..urang lain nang jadi pangantin..urang lain nang mamuga-e pangantin.

Tu pang rahsia nang kada siapa tahu....hanya Julak awan Imas. Julak uzur banar damini taga magun haja bajaja ais krim. Imas magun haja mandiami rumah arwah nang abah...kada ba-anak, nang laki hanyar haja meninggal 2 tahun lapas. Sejak peristiwa malam pengantin tu Julak kada suah lagi batamuan awan Imas. Parit 8 gin hidin kada lalu lagi mun bajualan ais krim. Kada sanggup amun taparaung awan Imas....kada sanggup walau malihat bumbung rumah Imas. Umai lawas dah Julak taunggut di lalongkang....sanja rupanya sudah...sayup-sayup kadangaran azan maghrib......

sekian haja cerdap(cerpen) nukilan Abe Hassan

No comments:

Post a Comment