MALAM itu Palui wan bininya lagi asyik maniring TV kisah urang bakalahi. Kada lawas pet..! "Abahnya..! dimana sampiyan?" ujar bininya takuciak.
"Ikam ni ding mantang-mantang kulitku bahirang lalu dipadahkan kada kalihatan, aku ada dihiga ikam," ujar Palui pina tasinggung.
"Ampun maaf abahnya-ai, ulun kada bamaksud manyambat sampiyan. Ulun takutan haja.." ujar nang bini pulang.
"Mauk banar! hanyar baisukan tadi mati lampu batatangah harian, maka malam mati pulang," ujar Palui manggarunum maambil lilin wan kurik api. "Siapa garang Mantri Panarangannya?" ujar nya pina paragah tahu tapi luput manafsirkan.
Imbah tuntung manyalakan lilin wan lampu tiplok Palui babulik pulang ka anu bininya. Dihiritnya nang bini ka dalam kamar mambawai guringan.
"Bujur kah ding awakku tadi kada kalihatan?" ujar Palui batakun imbah sampai di paguringan
"Jangan sarik lah abahnya. Sabujurnya sampiyan itu bahirang banar. Tapi biar hirang asal sihat," sahut nang bini.
"Awakku bujur sihat tapi... aku supan jua kulitku lutung mahirang kaya harang awan pina baminyak bila bapaluhan. Makanya aku rancak taungut mamikirakan, dasar juduh kita jua ading Aluh Utih-ai kawa jadi laki-bini, ujar Palui.Aku hiran jua, mungkin ading nang putih kuning sampai dingarani Aluh Utih tabalik mata hakun wan aku," ujarnya pina marista.
"Ulun ihlas haja wan sampiyan karna sampiyan bujur-bujur lalakian sejati, rajin bagawi bahaharian di pahumaan gasan mambari makani anak-bini," ujar bininya mamuji.
"Kaya apa caranya supaya awakku putih kaya ading ?" ujar Palui batakun.
"Bawa batapa samingguan dalam kamar, kalu parlu dalam guha," ujar bininya manyaranakan.
"Jangankan saminggu, sahari samalaman haja kada tahan kacuali batapa badudua wan ading," sahut Palui marayu.
Kada lawas imbah bapapanderan, Palui kaluar kamar handak bakamih.Diatas mija dilihatnya ada bungkusan ubat batulisan "jamu kaputihan'.
"Ooo....... pantas haja biniku putih kuning kulitnya karna ma-amalkan manginum jamu kaputihan," ujar Palui dalam hati.Lalu diambilnya sabungkus langsung dinginumnya. Ini kejutan, ujarnya karna cagar kawa manyamai kulit bininya.
Baisukannya nang bini takajut banar karna kahilangan jamu kaputihan nang handak dinginumnya, lalu batakun wan Palui.
"Ui abahnya, adalah sampiyan malihat ubat ulun ?" ujarnya.
"Ading rupanya barahasiaan banar handak mamutihakan awak ada amalan manginum jamu, ujar Palui.Makanya aku handak jua ba-awak putih kaya ading, imbah kulihat ada ubat pamutih awak maka langsung kunginum sampai talu bungkus," ujar Palui bapadah tarus tarang wan bininya.
"Masyaallah," ujar bininya taduduk mandangar jawaban Palui.
"Kanapa ding maka takajut sampai taduduk ?" ujar Palui.
"Sampiyan......sampiyan tanginum ubat ulun, jamu itu kada gasan pamutih awak tapi gasan mahilangi sakit wayah datang bulan karna ulun ada bapanyakit singgugut, kaputihan, haid kada lancar," sahut bininya.
Imbah mandangar jawaban bininya, baganti si Palui nang tadangkak...
...www.mypbm.org
No comments:
Post a Comment